Örn Alm­ars­son, hafnfirskur efna­fræðing­ur bú­sett­ur í Massachusetts í Banda­ríkj­un­um, er einn þeirra sem vinna nú að mögu­legu bólu­efni gegn kór­ónu­veirunni sem veld­ur COVID-19 sjúk­dómn­um.

Örn starfar hjá fyrirtækinu Moderna og þar hefur m.a. verið unnið að þróun á bóluefnum í nokkur ár. Í viðtali í Morgunblaðinu sem birt var á dögunum segir Örn að COVID-19 sjúkdómurinn sé mjög nýr og genasamsetning hans ekki þekkt fyrr en í byrjum ársins 2020. Banda­ríska heil­brigðis­stofn­un­in (NIH) hafi hvatt til þess að unnið yrði að bólu­efni gegn veirunni með hraði, og Moderna, hafi tekið það verk­efni að sér.

Örn, lengst til hægri, ásamt systkinum sínum Steinari og Önnu Birnu. Steinar starfar hjá Ferðaþjónustu fatlaðra og Anna Birna er prófessor við háskólann í Kaupmannahöfn. Mynd/aðsend.

Örn seg­ir þó að ein­ung­is sé um að ræða fyrsta stig en heil­mik­il vinna eigi eft­ir að eiga sér stað áður en full­búið bólu­efni gegn kór­ónu­vírusn­um verður komið á markað og í samtali við Morgunblaðið gæti það tekið um ár að koma fullbúnu bóluefni á markað. Örn hefur verið búsettur í Bandaríkjunum sl. 30 ár. Sjá nánar í viðtalinu hér.

Almar lengst til vinstri, ásamt sonunum Erni og Steinari. Mynd í eigu Almars.

Innan við 50 dagar síðan allt var sett í gang

Miklar annir eru hjá Erni um þessar mundir og við vildum ekki trufla hann of mikið svo að við höfðum samband við föður Arnar, lyfjafræðinginn og fyrrum eiganda Apóteks Hafnarfjarðar, Almar Grímsson. Almar, og eiginkona hans Anna Björk Guðbjörnsdóttir, eru að vonum stolt af syni sínum, sem Almar segir vera ekta Gaflara, enda fæddur á Sólvangi. „Örn er fyrst og fremst er að vinna að heiman núna í símanum. Þetta verkefni hjá honum kom vegna þess að þetta hefur verið kapphlaup frá því að veiran skaut upp kollinum. Genasamsetning vírussins var birt um miðjan janúar og bóluefnið var sent til NIH á 42 dögum. Og á innan vid 2 mánudum var klínísk rannsókn sett af stað á vegum NIH,“ segir Almar.

Örn og fjölskylda. Mynd í eigu þeirra.

Kona Arnar hans er Brynja Einarsdóttir, dóttir Einars Gíslasonar fyrrverandi íþróttakennara og konu hans Halldóru Jóhannsdóttur. Brynja (sem einnig er Gaflari) og Örn eiga þrjú börn, þau Karitas, Halldór og Bjarka.

Sterkar hafnfirskar rætur

Myndir sem Almar sendi af Erni, en hann hefur alla tíð þótt liðtækur gítarleikari.

Almar segir Örn og Brynju eiga íbúð við Suðurvang og Örn komi oft og dvelji þar þegar hann er á leið yfir til Evrópu vegna vinnu og í stuttum fríum. „Hann hefur alla tíð verið séní þótt hann hafi ekki flíkað því. Hann kláraði stúdentinn á þremur árum frá Flensborg, kláraði BS í efnafræð í Háskóla Íslands og flutti svo til Kalíforníu 1989 og var það í háskóla í 5 ár en hefur verið með fasta búsetu á austurströnd USA síðan. En hann er með sterkar rætur hér, það vantar ekki!“