Ökumenn þekki reglur og hugi betur að öryggi

Lögreglan á höfuðborgarsvæðinu tilkynnti í dag um banaslys sem varð norðan gatnamóta Kringlumýrarbrautar og Sæbrautar á níunda tímanum í morgun, þegar rafmagnshlaupahjól og létt bifhjól rákust þar saman. Annar ökumannanna lést og hinn slasaðist alvarlega. Vespur og létt bifhjól eru vinsæll og þægilegur ferðamáti fyrir ungt fólk jafnt sem fullorðna. Það er leyfilegt að aka þessum farartækjum á gangstígum og hjólastígum en jafnframt nauðsynlegt að ökumenn þekki vel þær umferðarreglur sem gilda og hugi vel að öryggi sínu og annarra vegfarenda.

Vert er að taka fram að það er á ábyrgð foreldra og forráðamanna að kenna ungmennum fram að 18 ára aldri þær umferðarreglur sem gilda og hvernig skuli haga akstrinum. Mikil umferð er oft á göngustígum, ekki síst nú þegar sífellt fleiri ganga, hjóla og hlaupa í frítíma sínum og einnig til og frá vinnu og skóla. Því er mikilvægt að sýna ýtrustu varkárni og tillitssemi.

Umferðareglur fyrir vespur og létt bifhjól eru eftirfarandi:

Ökumaður þarf að hafa náð 13 ára aldri.

Ökuréttinda er ekki krafist.

Hjólin eru skráningar- og skoðunarskyld, þ.e. við nýskráningu og eigendaskipti.

Skylt er að vera með hjálm.

Aka má á götum en mælt er með að aka á göngustígum, hjólastígum eða gangstétt og taka þar fullt tillit til annarra vegfaranda.

20 ára og eldri mega gefa far og verður hjólið þá að vera gert fyrir farþega.

Ekki má rjúfa innsigli svo hægt sé að keyra hraðar en 25 km/klst. Ef það er gert tilheyrir hjólið ekki lengur viðkomandi flokki og verður þá að taka próf og tryggja hjólið.

Ofangreindar upplýsingar fengust á síðum tryggingarfyrir tækja og Samgöngustofu. Nánari upplýsingar má einnig sjá hér í fræðslumyndbandi Samgöngustofu.