Fyrsta ferð leiðar nr. 19 í nýju leiðaneti Strætó fór frá Kaplakrika kl. 9.25 í morgun. Hluti af starfshópi og bæjarstjórn Hafnarfjarðar var á svæðinu og tóku þátt í þessari sögulegu ferð, þ.á.m. Helga Ingólfsdóttir, formaður umhverfis- og framkvæmdaráðs Hafnarfjarðar.
Í dag tekur gildi nýtt og einfaldara leiðanet hjá Strætó í Hafnarfirði. Leiðir 22, 33, 34, 43 og 44 munu hætta akstri. Ný leið 19 og lengri leið 21 munu leysa þær af hólmi.
Á næstu árum munu almenningssamgöngur á höfuðborgarsvæðinu taka miklum breytingum. Stærstu umbótarverkefnin eru annars vegar uppbygging á Borgarlínu innviðum fyrir hraðvagnakerfi (BRT) og hins vegar endurskoðun á leiðaneti Strætó vegna uppbyggingar Borgarlínu þar sem þörf er á að aðlaga leiðanetið að Borgarlínu og nýta innviði hennar. Þannig verði stuðlað að því að almenningssamgöngukerfið virki sem ein heild.
Þessi breyting í Hafnarfirði er því fyrsta skrefið í átt að Nýju leiðaneti Strætó og Borgarlínu.
Leið 19
Leið 19 mun aka frá Kaplakrika, um Hjallabraut, Setberg, Ásabraut, til Ásvallalaugar og til baka. Leiðin ekur skv. 15 mínútna tíðni á annatímum og 30 mínútna tíðni utan annatíma. Tengingar við leiðir 1, 21 og 55 verða í Firði.
Tímatöflu leiðarinnar má nálgast hér.
Leið 21
Leið 21 lengist og mun aka milli Mjóddar og Miklaholts í stað þess að aka á milli Mjóddar og Fjarðar. Leiðin mun áfram aka á 30 mínútna fresti allan daginn. Tengingar við leiðir 1, 19 og 55 verða í Firði.
Tímatöflu leiðarinnar má nálgast hér.
Hér fyrir neðan má finna leiðakort af Hafnarfirði eftir að breytingin tekur gildi.
