Hafnarfjarðarbær er langstærsti vinnustaður þessa þriðja stærsta sveitarfélags á landinu. Um er að ræða 2200 störf, þar sem m.a. 850 háskólamenntaðir starfsmenn (fastráðnir og tímabundið ráðnir) eru í um 100 grunnstarfsheitum. Grunnstarfsheitin eru þó alls um 140 og oft margir undirflokkar. Við þetta bætist mikill fjöldi sumarstarfa. Fjölbreytnin er því mikil, bæði í mannauði og verkefnum. Við ræddum við Guðrúnu Þorsteinsdóttur mannauðsstjóra.
Guðrún býr í Reykjanesbæ og keyrir vanalega daglega Reykjanesbrautina til og frá vinnu og nýtir þann tíma ýmist í að undirbúa sig, njóta gæðastundar, ná sér niður eftir langan dag eða taka símtöl. Hún finnur meðal samstarfsfólks sem býr í Hafnarfirði hversu mikilla forréttinda það nýtur með því að búa og starfa í bænum. „Ég vinn oftar að heiman núna vegna samkomubannsins, eins og margt annað starfsfólk hjá bænum. Þarft þurfti að skipuleggja heilmikið á vinnustaðnum á mjög skömmum tíma vegna ástandsins. Húsnæði Ráðhúss Hafnarfjarðar er gamalt og rýmið lítið, svo að nægði ekki að virða 2 metra regluna því það eru oft 2-3 saman á litlum skrifstofum. Við skiptum því liði, ekki fleiri en 20 í hólfum og fólk var sett á vaktir heima eða á skrifstofunni. Það þurfti að tæknivæðast og upplýsa starfsfólk mjög hratt og á tölvu- og þróunardeildin hrós skilið fyrir sína vinnu fyrir að taka út margra ára þróun á örfáum vikum. Deildin lagði reyndar grunninn að þessu þegar nýr sviðsstjóri tók við í fyrra og svo nýr deildarstjóri.“
Starfsþróunarmöguleikar og námsstyrkir
Guðrún segir að til þess að víð starfsemi bæjarins gangi sem best fyrir sig þurfi að vanda valið við ráðningar á starfsfólki á öllum stigum og bærinn búi yfir verulega góðum mannauði. „Starfsemin er mjög fjölbreytt og það hefur dálítið borið á vöntun á fagfólki frá því að ég tók við fyrir einu og hálfu ári. Það eru almennar sveiflur á vinnumarkaði og þegar það er góðæri þá er erfiðara að manna störf hjá bænum en núna glæðist mögulega eitthvað til og það er ýmislegt áhugavert í boði fyrir rétt fólk.“ Meðal annars sé í undirbúningi átak vegna sumarstarfa fyrir aldurinn 18-25 ára. „Svo eru ákveðin fríðindi sem fylgja því að starfa hjá bænum, s.s. frítt í sund, bókasafnskort, líkamsræktarstyrkur og samgöngusamningar. Við reynum sífellt að bæta okkur því við erum alltaf í samkeppni við almennan vinnumarkað. Starfsþróunarmöguleikar eru líka miklir hjá okkur og oft byrjar ungt fólk í einu starfi til að þreifa fyrir sér, en menntar sig svo og fer jafnvel á námssamning eða námsleyfi í boði bæjarins og það skilar árangri.“
Að lokum vill Guðrún taka fram að hún finnur fyrir í viðtölum við starfsfólk hversu algeng ánægja er meðal starfsfólks hjá bænum. „Það talar um glaðlegt andrúmsloft, léttleika, traust og virðingu. Starfsfólk sem býr í bænum hefur jafnvel breytt um lífsstíl og hjólar eða gengur í vinnuna. Bærinn er líka mjög miðsvæðis, notalegur bæjarbragur, nálægð og kærleikur þrátt fyrir fjölmennið og fólk þekkist á götu og heilsast.“
Forsíðumynd/OBÞ:
Frá vinstri: Guðrún Þorsteinsdóttir, mannauðsstjóri, Ida Jensdóttir, verkefnastjóri, Haraldur Eggertsson, sérfræðingur í kjaramálum og Ólafur H Harðarson, mannauðsráðgjafi.
Þessi umfjöllun er samstarf.
