Hildur Guðnadóttir, tónskáld og Hafnfirðingur ársins 2020, hlaut Grammy-verðlaun áðan fyrir tónlist sína í stórmyndinni Joker. Hún hefur áður hlotið Óskarsverðlaun, Golden Globe-verðlaun og BAFTA-verðlaun fyrir tónlistina í myndinni.
Hildur var tilnefnd til verðlauna fyrir bestu tónlist í sjónrænum miðlum, en sá flokkur nær yfir kvikmyndir, tónlist og tölvuleiki. Hún var einnig tilnefnd til verðlauna fyrir verkið „Bathroom Dance“ í öðrum flokki en vann ekki til þeirra verðlauna. Hildur ávarpaði hátíðina í gegnum fjarfundarbúnað og sagðist þakklát fyrir verðlaunin.
Þetta er í annað skiptið sem Hildur hlýtur Grammy-verðlaun en á síðasta ári vann hún til þeirra verðlauna fyrir tónlistina í þáttunum Chernobyl.
Myndir úr eigu móður Hildar.
