Nýverið undirritaði umhverfisráðherra formlega friðlýsingu háhitasvæðis Brennisteinsfjalla á Reykjanesskaga í samræmi við Rammaáætlun. Er það mikið fagnaðarefni að þetta stórbrotna eldfjallasvæði fái vernd fyrir ásælni orkufyrirtækjanna. Verndarsvæðið er 123 ferkílómetrar að stærð og er stærsta óbyggða víðerni sem eftir er í nágrenni höfuðborgarsvæðisins.

Brennisteinsfjöll bjóða upp á sannkallaða jarðfræðiveislu með hlaðborði gosminja af öllu tagi: Tignarlegum eldborgum, gígum og gígaröðum, hrauntröðum, hrauntjörnum, niðurföllum, hraunfossum, hraunhellum, opnum jarðskjálftasprungum,  misgengi og öðrum náttúrufyrirbærum.
Oft hefur gosið á sprungurein Brennisteinsfjalla, bæði á forsögulegum og sögulegum tíma.  Hraun hafa runnið niður af fjöllunum í ýmsar áttir eins og til dæmis má sjá á hinum glæsilegum hraunfossum sem steypast fram af brúnum fjallsins í Herdísarvík og blasa við þegar ekið er eftir Suðurstrandaveginum.  Brennisteinsfjöll eru eina háhitasvæðið í vestara gosbeltinu sem ekki hefur verið rannsakað með tilraunaborunum. Svæðið er því óraskað og fáfarið sem gerir það einn meira heillandi og eykur náttúruverndargildi þess.

Horft yfir hinn stórbrotna Kistufellsgíg í Brennisteinsfjöllum.  Höfuðborgarsvæðið í fjarska. Mynd/elg

Því miður er það svo að aðgengi að þessari náttúruparadís hefur verið takmarkað til muna með nýlegri lokun á Bláfjallavegi.  Þar með fer enginn upp í Brennisteinsfjöll lengur nema  leggja á sig tuga kílómetra erfiða göngu.  Aðgengi að öðrum vinsælum náttúperlum hefur einnig verið skert með þessari lokun, s.s. að vinsælli gönguleið um Grindaskörð og Kristjánsdalahellum.

Að lokun Bláfjallavegar standa Vegagerðin og Hafnarfjarðarbær undir yfirskini vatnsverndarsjónarmiða. Þau rök halda hins vegar engu vatni þegar horft er til þess að sjálfsagt þótti að veita Landsneti  leyfi til að vaða yfir þetta sama vatnsverndarsvæði með nýja háspennulínu, miklu nær vatnsbólunum heldur en þessi vegur er. 
Hvar voru vatnsverndarsjónarmiðin þá?

Bent hefur verið á, af þeim sem mótmælt hafa lokuninni, að fjöldi annarra vega liggur um vatnsverndarsvæði Höfuðborgarinnar , vegir sem  margir hafa mun meiri umferð heldur en umræddur Bláfjallavegur. Rökin fyrir þessari lokun er því algjörlega óskiljanleg og skora ég á bæjarvöld í Hafnarfirði að beita sér fyrir afléttingu hennar, svo almenningur eigi greiðari leið að þeirri einstöku náttúruperlu sem nú  hefur verið friðlýst í Brennisteinsfjöllum. Tala nú ekki um þegar verið er að hvetja almenning til að ferðast innanlands í sumar og umferð hefur snarminnkað við brotthvarf erlendra ferðamanna.

Ellert Grétarsson,
náttúruunnandi.