Bókasafn Hafnarfjarðar er 98 ára og meðal þeirra elstu á landinu. Hafnfirðingar tengjast bókasafninu sterkum böndum og mikið er um gestagang, útlán og ýmislegt annað. Við hittum Sigrúnu Guðnadóttur, sem tók við stöðu forstöðumanns í nóvember. Hún segir margt í pípunum, svo sem fleiri viðburði og aðstöðu fyrir hlaðvarp fyrir almenning. 

Sigrún með hluta af hópi starfsfólks bókasafnsins. Myndir/OBÞ
Bókasafnið séð utan frá.

„Mér fannst ég bara smella hér inn og vera komin heim þegar ég byrjaði. Það var vel tekið á móti mér, bæði af starfsfólki og gestum,“ segir Sigrún skælbrosandi aðspurð. Hún starfaði áður hjá Borgarbókasafninu og Bókasafni Kópavogs. „Það eru forréttindi að starfa við það sem er skemmtilegt og það er alltaf hægt að brydda upp á einhverju nýju; fylgjast með hvað er í gangi í bókasafnsheiminum hverju sinni.“

Sérdeilis notaleg aðstaða til að dvelja einn eða með fleirum. Mynd/OBÞ
Fjölfrótt og reynslumikið starfsfólk er á hverju strái sem getur aðstoða gesti um hvaðeina sem kemur upp í hugann í tengslum við safnið. Mynd/OBÞ

Bókasafn Hafnarfjarðar bjóði upp á margt og ýmislegt sé í farveginum sem Sigrúnu langar, með starfsfólki sínu, að leggja áherslu á. „Safnið skiptir miklu í ímynd Hafnfirðinga. Þeir eru mjög tengdir safninu sínu. Hér koma margir gestir og útlán eru mikil. Mig langar samt að ná til enn fleiri. Það er fjöldi fólks af erlendum uppruna í bænum, aðallega Pólverjum, og ég vil ná til þeirra. Hingað kemur aftur til starfa pólskur bókavörður í febrúar sem ætlar m.a. að hafa sögustundir á pólsku.“ 

Hlýleg aðstaða er víða í húsnæði safnsins. Hérna sest stundum fólk saman niður með handavinnu. Mynd/OBÞ
Spjaldtölvur eru búnar að leysa af fyrirferðarmiklar tölvur. Mynd/OBÞ
Lesrými eru víðar en í lokuðu námsmannarými og á 1. hæð. Hérna getur fólk setið í næði og blaðað í miklu úrvali af efni. Mynd/OBÞ
Hluti af tónlistardeild bókasafnsins, þar sem Sigrún vill fjölga viðburðum. Andrés Gunnlaugsson gítarleikari tekur hér lagið við úthlutun styrkja úr sjóði Friðriks Bjarnasonar og Guðlaugar Pétursdóttur, í febrúar 2018. Mynd/OBÞ

Bókasafn Hafnarfjarðar hefur þá sérstöðu, ólíkt flestum slíkum, að vera með tónlistardeild – og það í stærra lagi. „Ég vil gera eitthvað meira með hana. Við ætlum t.a.m. að vera með jazztónleika þar í lok Safnanætur sem verður 7. febrúar.“ Þá hafi safnið mjög fjölbreytt efni, allt frá bókum, tímaritum og blöðum upp úrval í flokki geisla- og mynddiska og hljóðbóka. „Hér eru 15 föst stöðugildi og alls 24 starfsmenn. Gott starfsfólk og mikill metnaður hefur verið lagður í fjölbreytni í öllu hér. Í næsta mánuði mun bætast við starfshópinn viðburðastjóri, Unnur Helga Möller. Svo ætlum við að opna hlaðvarpsaðstöðu á 3. hæð og þá getur fólk leigt sér tíma og búið til eigin þætti. Það voru starfsmenn hér á safninu sem komu með hugmyndina og ég tók að sjálfsögðu vel í það og allt það starfsfólk sem kemur að ákvörðun og framkvæmd.“

Þessi mæðgin voru kampakát með aðstöðuna og púsluðu saman. Mynd/OBÞ
Þessi „afgin“ nutu samverunna í barnabókadeildinni og lásu saman bók um óvænta vináttu. Mynd/OBÞ

Sigrún vill að lokum vekja sérstaka athygli á að lesaðstöður eru ekki bara á jarðhæð, heldur á öllum hæðum. Jafnvel í meira næði. „Svo ætlum við að breyta og bæta salinn í kjallaranum og leigja hann meira út fyrir fundi, samkomur og fyrirlestra. Félagasamtök hafa sýnt því áhuga og hægt verður að vera út af fyrir sig, með kaffiaðstöðu og salerni. Einnig vil ég bæta við aðstöðu þar sem fólk getur komið og saumað í náinni framtíð. Ég vil að fólk finni að hér sé margt að njóta og að allir geti fundið eitthvað við sitt hæfi. Ég sé fram á bjarta og skemmtilega tíma á bókasafninu og það í samstarfi við sem flesta,“ segir Sigrún að endingu. 

Allir ættu að geta fundið eitthvað við sitt hæfi. Mynd/OBÞ
Salurinn í kjallaranum sem verður útbúinn til útleigu. Mynd/OBÞ
Hér mun aðstaða verða sett upp fyrir hlaðvarp sem almenningur getur nýtt sér. Mynd/OBÞ

Þessi umfjöllum er í samstarfi við Hafnarfjarðarbæ.