Farsímabann, Ungmennahús og Systra Akt

Önnur bein útsending Fjarðarpóstsins á árinu fór í loftið í hádeginu sl. fimmtudag, í samstarfi við Hafnarfjarðarbæ, Bæjarbíó og Skjáskot. 1000 manns horfðu á útsendinguna í beinni og það er met.  Eftir á áhorf bætast við smátt og smátt, enda er um að ræða verkefni sem við hjá Fjarðarpóstinum vitum að tekur tíma að síast inn í vitund Hafnfirðinga og annarra áhorfenda. 

Sem fyrr var þáttarstjórn í höndum Olgu Bjartar Þórðardóttur, útgefanda og ritstjóra Fjarðarpóstsins. Í fyrra viðtalinu spjallaði hún við John Friðrik Bond Grétarsson, verkefnastjóra hjá Ungmennahúsinu í Hafnarfirði og Geir Bjarnason, íþrótta- og tómstundafulltrúa hjá Hafnarfjarðarbæ, um málefni ungmenna í Hafnarfirði. Síðan komu til hennar Valdimar Víðisson, skólastjóri Öldutúnsskóla og Erika Lind Ólafsdóttir, nemandi í 9. bekk í sama skóla, og ræddu áhrif og árangur af farsímabanni sem tók gildi í byrjum þessa árs. Tónlistaratriði þáttarins var ekki af verri endanum, en Leikfélag Flensborgar flutti tvö söngatriði úr söngleiknum Systra Akt.

Hér fyrir neðan er hægt að nálgast hvern þáttarlið fyrir sig eða þáttinn í heild sinni. Efnið mun svo að sjálfsögðu lifa áfram góðu lífi á Facebook og þannig skrásetjum við saman sögu Hafnarfjarðar.