Falin perla í Suðurbæjarlaug

Líkamsræktarstöðin GYM heilsa fagnar á þessu ári 20 ára starfsafmæli í Suðurbæjarlaug. Við kíktum í heimsókn, þar sem Kjartan Már Hallkelsson rekstrarstjóri leiddi okkur um stöðina, sem hefur safnað upp tryggum og góðum hópi viðskiptavina í gegnum árin.

Það eru ekki allir sem vita að GYM heilsa er í um 300 fermetra rými á neðri hæð Suðurbæjarlaugar. Rýmið skiptist í nokkur minni rými sem hvert og eitt skipar sína sérstöðu með öllum þeim tækjum og tólum sem góð líkamsræktarstöð býður upp á. „Við byrjuðum í 80 fermetrum en erum búin að koma okkur fyrir á öllu þessu svæði í dag,“ segir Kjartan Már og er augljóslega stoltur af þróuninni á þessum tíma. „GYM heilsa erum á sex stöðum víða um landið en með sömu kennitölu frá uppafi, þótt nafnið hafi aðeins breyst í tengslum við eigendaskipti. Það voru Svíar sem stofnuðu fyrirtækið í Kópavogi 1997 og ég kom inn í þetta með þeim 1998. Árið 2012 var þetta á endanum breytt í það nafn sem það er í dag.“

Fólkið auðgar lífið

Spurður um hvað standi upp úr eftir þessi 20 ár í bransanum, segir Kjartan það vera viðskiptavinina. „Þeir gera þennan stað að því sem hann er. Allt það fólk, á öllum aldri, sem ég hef kynnst á þessum árum. Ég heilsa fólki um allan bæ sem ég hef kynnst hér. Það auðgar lífið. Þessi stöð er líka falin perla og aðstaðan er stærri og betri en fólk á oft von á. Við bjóðum líka upp á einstaklega gott verð sem hefur ekki hækkað í fjögur ár, árskort á 35.990 krónur. Við viljum nefnilega bjóða fólki upp á góða aðstöðu til líkamsræktar á góðu verði. Svo hefur fólkið að sjálfsögðu aðgang að lauginni líka.“

Bjarney Kristjánsdóttir býr við Norðurbakkann og kemur í GYM heilsu að lágmarki þrisvar í viku. „Ég er búin að uppgötva að það er miklu betra að koma en að koma ekki. Það kemur skrokknum á manni í gang fyrir daginn. Það er líka bara lífsspursmál að hugsa um heilsuna og þessi stöð er mjög fín. Rosalega góðar sturtur og allt sem ég þarf hér.“